ദോഹ: ആഗോള ഭൗമമണിക്കൂർ (Earth Hour)ആചരിക്കുന്നതിന്റെ ഭാഗമായി ഇന്ന് രാത്രി രാജ്യത്തെമ്പാടും ഒരു മണിക്കൂർ വിളക്കണയ്ക്കാൻ ഖത്തർ പരിസ്ഥിതി, കാലാവസ്ഥാ വ്യതിയാന മന്ത്രാലയം (MoECC) പൊതുജനങ്ങളോടും സ്ഥാപനങ്ങളോടും ആഹ്വാനം ചെയ്തു. ഇന്ന് രാത്രി 8.30 മുതൽ 9.30 വരെഅത്യാവശ്യമില്ലാത്ത ലൈറ്റുകളും വൈദ്യുത ഉപകരണങ്ങളും അണച്ചുവെച്ച് ഈ പരിസ്ഥിതി സൗഹൃദ സംരംഭത്തിൽ പങ്കാളികളാകണമെന്ന് മന്ത്രാലയം അറിയിച്ചു.
കാലാവസ്ഥാ വ്യതിയാനത്തിന്റെ ദൂഷ്യഫലങ്ങൾ കുറയ്ക്കുന്നതിനും സുസ്ഥിരമായ ഭാവി ഉറപ്പാക്കുന്നതിനും വ്യക്തികൾക്കും സംഘടനകൾക്കും വലിയ പങ്കുണ്ടെന്ന് മന്ത്രാലയം എക്സ് (X) പ്ലാറ്റ്‌ഫോമിലൂടെ വ്യക്തമാക്കി. ഊർജ്ജ ഉപഭോഗം കുറയ്ക്കുന്നതിലൂടെ പ്രകൃതി വിഭവങ്ങൾ സംരക്ഷിക്കേണ്ടതിന്റെ പ്രാധാന്യത്തെക്കുറിച്ച് ബോധവൽക്കരണം നൽകാനാണ് ഈ ആഗോള കാമ്പയിൻ ലക്ഷ്യമിടുന്നത്.
ഭൂമിയെ സംരക്ഷിക്കുന്നതിനായുള്ള പ്രതീകാത്മകമായ ഈ 60 മിനിറ്റ് ലോകമെമ്പാടുമുള്ള ദശലക്ഷക്കണക്കിന് ആളുകൾക്കൊപ്പം ഖത്തറും എല്ലാ വർഷവും ആചരിച്ചുവരുന്നു. കാലാവസ്ഥാ വ്യതിയാനത്തെ നേരിടാനുള്ള അന്താരാഷ്ട്ര ശ്രമങ്ങൾക്ക് ഖത്തർ നൽകുന്ന പിന്തുണയുടെയും പരിസ്ഥിതി അവബോധം ശക്തിപ്പെടുത്തുന്നതിന്റെയും ഭാഗമാണിതെന്ന് മന്ത്രാലയം കൂട്ടിച്ചേർത്തു.
